មន្ត្រីនគរបាលចរាចរណ៍ ស័ក្តិ៣ ត្រូវផ្អាកការងារ ខណៈមន្ត្រីកិច្ចសន្យាម្នាក់ទៀត នឹងត្រូវបណ្តេញចេញ ករណីជំរិតទារប្រាក់ ៥០០ដុល្លារ ពីជនបរទេស

មន្ត្រីនគរបាលចរាចរណ៍ ស័ក្តិ៣ ឈ្មោះ ហោ ផល្លី ត្រូវបានសម្រេចឱ្យផ្អាកការងារ ខណៈមន្ត្រីកិច្ចសន្យា ឈ្មោះ ស៊ឹម រដ្ឋា នឹងត្រូវបណ្តេញចេញពីការងារ ពាក់ព័ន្ធនឹងករណីជំរិតទារប្រាក់ចំនួន ៥០០ដុល្លារអាម៉េរិក ពីជនបរទេស។

តាមព័ត៌មានដែលទទួលបាន ករណីនេះបានកើតឡើងនៅ គោលដៅតាមបណ្តោយផ្លូវម៉ៅសេទុង ខណៈជនបរទេសចំនួន ២នាក់ កំពុងធ្វើដំណើរត្រឡប់មកពីខេត្តកំពត ហើយត្រូវបានមន្ត្រីនគរបាលចរាចរណ៍ឃាត់ត្រួតពិនិត្យ។

ជុំវិញហេតុការណ៍នេះ អាជ្ញាធរមានសមត្ថកិច្ចបានចាត់វិធានការរដ្ឋបាលចំពោះមន្ត្រីពាក់ព័ន្ធ ដោយមន្ត្រីនគរបាលចរាចរណ៍ ស័ក្តិ៣ ត្រូវផ្អាកការងារ និងមន្ត្រីកិច្ចសន្យា ត្រូវប្រឈមនឹងការបណ្តេញចេញពីការងារ ដើម្បីបង្ហាញពីការមិនអត់ឱនចំពោះអំពើប្រព្រឹត្តខុសវិន័យ និងប៉ះពាល់ដល់កិត្តិយសស្ថាប័ន។

ចំពោះប្រាក់ចំនួន ៥០០ដុល្លារ ដែលបានយកពីជនបរទេស ក៏នឹងត្រូវប្រគល់ជូនម្ចាស់ប្រាក់វិញ ដើម្បីដោះស្រាយបញ្ហាដោយតម្លាភាព និងរក្សាសិទ្ធិរបស់ជនរងគ្រោះ។

ករណីនេះក៏ជាការរំលឹកដល់មន្ត្រីអនុវត្តច្បាប់ទាំងអស់ ឱ្យប្រកាន់ខ្ជាប់នូវក្រមសីលធម៌ វិន័យ និងភាពស្មោះត្រង់ក្នុងការបំពេញភារកិច្ច ជាពិសេសនៅពេលអនុវត្តច្បាប់ចរាចរណ៍ចំពោះប្រជាពលរដ្ឋ និងជនបរទេស៕